ವಿಜಯೋತ್ಸವ ನೋಡಿ ಕಣ್ತುಂಬಿಕೊಂಡ ಆರ್‌ಸಿಬಿ ಟೀಂ, ಪಾಂಡ್ಯಾ ಮಾತನ್ನೊಮ್ಮೆ ಕೇಳಿ ಫ್ಯಾನ್ಸ್!

ಶನಿವಾರ ಮಧ್ಯರಾತ್ರಿ ಇಡೀ ಬೆಂಗಳೂರು ನಗರವೇ ಆರ್‌ಸಿಬಿಯ ವಿಜಯೋತ್ಸವದ ಸಂಭ್ರಮದಲ್ಲಿ ಮುಳುಗಿತ್ತು. ಐಪಿಎಲ್‌ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ)  2 ರನ್‌ಗಳಿಂದ ರೋಚಕವಾಗಿ ಗೆದ್ದು, ಸಾವಿರಾರು ಅಭಿಮಾನಿಗಳ ಹೃದಯ ಗೆದ್ದಿತು. ಎಂ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಪಂದ್ಯ ಮುಗಿದ  ಬಳಿಕ ಆರ್‌ಸಿಬಿಯ ಟೀಮ್‌ ಬಸ್‌ ಹೊರಡುತ್ತಿರುವ ದೃಶ್ಯವನ್ನು ನೋಡಲು ಸಾವಿರಾರು ಅಭಿಮಾನಿಗಳು ಕ್ರೀಡಾಂಗಣದ ಹೊರಗೆ ಕಾದು ಕುಳಿತಿದ್ದರು.  ಬಸ್‌ಗೆ ಅಡ್ಡಬರದಂತೆ ನೋಡಿಕೊಳ್ಳಲು ಪೊಲೀಸರು ಭದ್ರತೆ ಒದಗಿಸಿದ್ದರು. ಕೆಲ ಅಭಿಮಾನಿಗಳು ಆಟಗಾರರನ್ನ ನೋಡಲು ಬಸ್‌ ಗೆ ಅಡ್ಡ ಬಂದಿದ್ದು, ಲಘುವಾಗಿ ಲಾಠಿ ಕೂಡ ಬೀಸಬೇಕಾಯ್ತು. 

ಇದರ ವಿಡಿಯೋವನ್ನು ಆರ್‌ಸಿಬಿ ಬಿಡುಗಡೆ ಮಾಡಿದೆ. 12.30ಕ್ಕೆ ಬಸ್‌ ನಲ್ಲಿ ಹೊರಬಂದಾಗ ಅಭಿಮಾನಿಗಳ ಹರ್ಷೋದ್ಗಾರ ನಿಂತಿರಲಿಲ್ಲ. "ನಂಬಲಸಾಧ್ಯ, ಎಂತಹ ಅನುಭವವಿದು, ಜನಗಳ ಕ್ರೇಜ್‌, ನಮಗೆ ಇಂತಹ ಹಾರೈಕೆ ಒಮ್ಮೆ ಸಿಗೋದು. ಆರ್‌ಸಿಬಿ ಅಂದ್ರೆ ಇಷ್ಟು ಪ್ರೀತಿ ಇದೆ. ನಮಗೆ ಇಷ್ಟೊಂದು ಮಟ್ಟದಲ್ಲಿ ಬೆಂಬಲಿಸುತ್ತಿರುವವರಿಗೆ ನಾವು ಟ್ರೋಫಿ ಗೆದ್ದು ಕೊಡಲೇಬೇಕು. ನಾವು ಗೆದ್ರೆ ಹೇಗಿರಬಹುದು ಏನಾಗಬಹುದು ಎಂದು ಊಹಿಸಿ!" ಎಂದು ಕೃನಾಲ್ ಪಾಂಡ್ಯ ಹೇಳುತ್ತಿದ್ದಾರೆ. ಜೊತೆಗೆ ಕ್ರೇಜಿಯಾಗಿದೆ. ಮೊದಲ ಬಾರಿಗೆ ಇಂತಹ ಎಕ್ಸಪೀರಿಯನ್ಸ್ ಆಯ್ತು. ಇದನ್ನು ವರ್ಣಿಸಲು ಪದಗಳೇ ಇಲ್ಲ ಎಂದು ಆಲ್‌ರೌಂಡರ್ ಕೃನಾಲ್ ಹೇಳಿದ್ದಾರೆ
 

ಆರ್‌ಸಿಬಿ ಬಸ್‌ ನಿಧಾನವಾಗಿ ಸಾಗುತ್ತಿದ್ದಾಗ, “RCB! RCB!” ಘೋಷಣೆಗಳು ರಸ್ತೆಗಳಲ್ಲೆಲ್ಲ ಪ್ರತಿಧ್ವನಿಸುತ್ತಿತ್ತು. ಪೋಲಿಸರು ಬಸ್‌ಗೆ ದಾರಿ ಮಾಡಿಕೊಡಲು ತಮ್ಮ ವಾಹನದಲ್ಲಿ ಮುಂದಿದ್ದರೆ, ಅಭಿಮಾನಿಗಳು ಕೆಂಪು-ಹಳದಿ ಧ್ವಜಗಳನ್ನು ಬೀಸುತ್ತಾ ಬಸ್‌ನ ಹಿಂದೆ ಬೈಕುಗಳಲ್ಲಿ ಹಿಂಬಾಲಿಸುತ್ತಿದ್ದರು. ಕೆಲವು ಬೈಕ್ ಸವಾರರು ಹೆಲ್ಮೆಟ್ ಇಲ್ಲದೆ ಸಾಗಿದ್ದು,   “ದ್ವಿಚಕ್ರ ವಾಹನದಲ್ಲಿ ಎಲ್ಲಾ ಅಭಿಮಾನಿಗಳು ಹೆಲ್ಮೆಟ್ ಧರಿಸಬೇಕು” ಎಂಬ ಸಂದೇಶವನ್ನು ಆರ್‌ಸಿಬಿ ನೀಡಿದೆ. ಆದರೆ ಸಂಭ್ರಮದ ಮಧ್ಯೆ ಇಂತಹ ಎಚ್ಚರಿಕೆಯ ಸಂದೇಶವು ತಲುಪಿರುವುದೇ ಕಡಿಮೆಯಾಗಿದೆ.

ಈ ಮಹತ್ವದ ಗೆಲುವಿನಿಂದ ಆರ್‌ಸಿಬಿ 2025ರ ಐಪಿಎಲ್ ಅಂಕಪಟ್ಟಿಯಲ್ಲಿ ಮೊದಲ ಸ್ಥಾನಕ್ಕೇರಿದೆ. ವಿರಾಟ್ ಕೊಹ್ಲಿಯ ಅದ್ಭುತ ಬ್ಯಾಟಿಂಗ್, ಶೆಫರ್ಡ್‌ ಅವರ ಅತಿವೇಗದ ರನ್‌ ಸುರಿಮಳೆ ಹಾಗೂ ಯಶ್ ದಯಾಳ್ ನೀಡಿದ ಕೊನೆಯ  ಸಖತ್‌ ಓವರ್ ಟೀಮ್ ಗೆಲುವಿಗೆ ಕಾರಣವಾಯಿತು. ಆರ್‌ಸಿಬಿ ಈವರೆಗೆ ಒಂದೇ ಒಂದು ಐಪಿಎಲ್ ಟ್ರೋಫಿ ಗೆದ್ದಿಲ್ಲವಾದರೂ, ತಂಡದ ಅಭಿಮಾನಿಗಳ ನಂಬಿಕೆ ಸದಾ ಬಲವಾಗಿ ಉಳಿದಿದೆ. ಈ ಭಾವನೆ ಮತ್ತು ಬಲವಂತವೇ ಆರ್‌ಸಿಬಿಯನ್ನು 18 ವರ್ಷಗಳಿಂದಲೂ ಮುನ್ನಡೆಸುತ್ತಿದೆ.

14 ಎಸೆತದಲ್ಲೇ ಶೆಫರ್ಡ್‌ 50 ರನ್‌: ಆರ್‌ಸಿಬಿ ಪರ ಅತಿ ವೇಗದ ಅರ್ಧಶತಕ!
ಭಾನುವಾರ ಚೆನ್ನೈ ವಿರುದ್ಧ ಪಂದ್ಯದಲ್ಲಿ ಆರ್‌ಸಿಬಿಯ ರೊಮಾರಿಯೋ ಶೆಫರ್ಡ್‌ ಕೇವಲ 14 ಎಸೆತಗಳಲ್ಲೇ ಅರ್ಧಶತಕ ಬಾರಿಸಿದ್ದಾರೆ. ಇದು ಆರ್‌ಸಿಬಿ ಪರ ಅತಿ ವೇಗದ, ಐಪಿಎಲ್‌ನಲ್ಲಿ ಜಂಟಿ 2ನೇ ಅತಿ ವೇಗದ ಅರ್ಧಶತಕ. ರಾಜಸ್ಥಾನದ ಯಶಸ್ವಿ ಜೈಸ್ವಾಲ್‌ 13 ಎಸೆತಕ್ಕೆ ಅರ್ಧಶತಕ ಬಾರಿಸಿದ್ದು ಈಗಲೂ ದಾಖಲೆ. ಉಳಿದಂತೆ ಕೆ.ಎಲ್‌.ರಾಹುಲ್‌, ಪ್ಯಾಟ್‌ ಕಮಿನ್ಸ್‌ ಕೂಡಾ 14 ಎಸೆತಗಳಲ್ಲೇ ಫಿಫ್ಟಿ ಸಿಡಿಸಿದ್ದಾರೆ. ಇನ್ನು, ಆರ್‌ಸಿಬಿ ಪರ ಅತಿ ವೇಗದ ಅರ್ಧಶತಕ ದಾಖಲೆ ಈ ವರೆಗೂ ಕ್ರಿಸ್‌ ಗೇಲ್‌ ಹೆಸರಲ್ಲಿತ್ತು. ಅವರು 2013ರಲ್ಲಿ ಪುಣೆ ವಿರುದ್ಧ 17 ಎಸೆತಗಳಲ್ಲಿ ಈ ಸಾಧನೆ ಮಾಡಿದ್ದರು.
 

 ಆರ್‌ಸಿಬಿ ಅಭಿಮಾನಿಗಳಿಂದ ಚೆನ್ನೈನ ಜೈಲು ಜೆರ್ಸಿ ಸೇಲ್!
ಆರ್‌ಸಿಬಿ ಹಾಗೂ ಚೆನ್ನೈ ಅಭಿಮಾನಿಗಳ ನಡುವಿನ ಕಿತ್ತಾಟ ಮತ್ತೊಂದು ಹಂತ ತಲುಪಿದೆ. ಇತ್ತೀಚೆಗೆ ಚೆನ್ನೈ ಕ್ರೀಡಾಂಗಣದಲ್ಲಿ ಲಾಲಿಪಾಪ್‌ ಪ್ರದರ್ಶಿಸಿ ಆರ್‌ಸಿಬಿ ಅಭಿಮಾನಿಗಳನ್ನು ಚೆನ್ನೈ ಅಭಿಮಾನಿಗಳು ಕೆಣಕಿದ್ದರು. ಇದಕ್ಕೆ ಪ್ರತಿಯಾಗಿ ಶನಿವಾರ ಚಿನ್ನಸ್ವಾಮಿ ಕ್ರೀಡಾಂಗಣದ ಹೊರಗಡೆ ಆರ್‌ಸಿಬಿ ಅಭಿಮಾನಿಗಳು ಚೆನ್ನೈ ತಂಡದ ‘ಜೈಲು ಜೆರ್ಸಿ’ಯನ್ನು ಮಾರಾಟ ಮಾಡಿದ್ದಾರೆ. ಫಿಕ್ಸಿಂಗ್‌ ಪ್ರಕರಣದಲ್ಲಿ ಚೆನ್ನೈ ತಂಡ 2016, 2017ರ ಐಪಿಎಲ್‌ನಿಂದ ನಿಷೇಧಕ್ಕೊಳಗಾಗಿತ್ತು. ಇದನ್ನೇ ನೆನಪಿಸುವ ರೀತಿಯಲ್ಲಿ ಕ್ರೀಡಾಂಗಣದ ಹೊರಗಡೆ ಕಪ್ಪು-ಬಿಳುಪಿನ, 2016-17 ಎಂದು ಬರೆದಿರುವ ಜೆರ್ಸಿ ಮಾರಾಟ ಮಾಡಿದ್ದಾರೆ. ಇದರ ಫೋಟೋಗಳು ಸಾಮಾಜಿಕ ತಾಣಗಳಲ್ಲಿ ವೈರಲ್‌ ಆಗಿದೆ.

 ರನ್‌ ಮೆಷಿನ್‌, ಕಿಂಗ್‌ ಖ್ಯಾತಿಯ ವಿರಾಟ್‌ ಕೊಹ್ಲಿ ಮತ್ತೆ ಹಲವು ದಾಖಲೆಗಳನ್ನು ತಮ್ಮ ಹೆಸರಿಗೆ ಬರೆದುಕೊಂಡಿದ್ದಾರೆ. ಶನಿವಾರ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಚೆನ್ನೈ ಸೂಪರ್‌ ಕಿಂಗ್ಸ್‌ ವಿರುದ್ಧ ಕೊಹ್ಲಿ ದಾಖಲೆಗಳ ಸುರಿಮಳೆಯನ್ನೇ ಸುರಿಸಿದರು. ಪಂದ್ಯದಲ್ಲಿ ಸ್ಫೋಟಕ ಆಟವಾಡಿದ ಕೊಹ್ಲಿ, 33 ಎಸೆತಗಳಲ್ಲಿ 5 ಬೌಂಡರಿ, 5 ಸಿಕ್ಸರ್‌ಗಳೊಂದಿಗೆ 62 ರನ್‌ ಬಾರಿಸಿದರು. ಇದರೊಂದಿಗೆ ಐಪಿಎಲ್‌ನಲ್ಲಿ 8500 ರನ್‌ ಪೂರ್ಣಗೊಳಿಸಿದ ಮೊದಲ ಆಟಗಾರ ಎನಿಸಿಕೊಂಡರು. ಅವರು ಸದ್ಯ 263 ಪಂದ್ಯಗಳ 255 ಇನ್ನಿಂಗ್ಸ್‌ಗಳಲ್ಲಿ 8509 ರನ್‌ ಗಳಿಸಿದ್ದಾರೆ. ಗರಿಷ್ಠ ರನ್ ಪಟ್ಟಿಯಲ್ಲಿ ರೋಹಿತ್‌ ಶರ್ಮಾ 2ನೇ ಸ್ಥಾನದಲ್ಲಿದ್ದಾರೆ. ಅವರು 267 ಪಂದ್ಯಗಳಲ್ಲಿ 6921 ರನ್‌ ಕಲೆಹಾಕಿದ್ದಾರೆ. ಶಿಖರ್‌ ಧವರ್‌ 222 ಪಂದ್ಯಗಳಲ್ಲಿ 6769 ರನ್‌, ಡೇವಿಡ್‌ ವಾರ್ನರ್‌ 184 ಪಂದ್ಯಗಳಲ್ಲಿ 6565 ರನ್‌ ಸಿಡಿಸಿದ್ದಾರೆ.

ಸಿಕ್ಸರ್‌ ದಾಖಲೆ:
ಟಿ20 ಕ್ರಿಕೆಟ್‌ನಲ್ಲಿ ತಂಡವೊಂದರ ಪರ 300+ ಸಿಕ್ಸರ್‌ ಸಿಡಿಸಿದ ಮೊದಲ ಆಟಗಾರ ಎಂಬ ಖ್ಯಾತಿಗೆ ಕೊಹ್ಲಿ ಪಾತ್ರರಾಗಿದ್ದಾರೆ. ಅವರು ಆರ್‌ಸಿಬಿ ಪರ ಐಪಿಎಲ್‌, ಚಾಂಪಿಯನ್ಸ್‌ ಲೀಗ್‌ ಸೇರಿ ಒಟ್ಟು 278 ಪಂದ್ಯಗಳಲ್ಲಿ 304 ಸಿಕ್ಸರ್‌ ಸಿಡಿಸಿದ್ದಾರೆ. ತಂಡವೊಂದರ ಪರ ಗರಿಷ್ಠ ಸಿಕ್ಸರ್‌ ಪಟ್ಟಿಯಲ್ಲಿ ಕ್ರಿಸ್‌ ಗೇಲ್‌ 2ನೇ ಸ್ಥಾನದಲ್ಲಿದ್ದಾರೆ. ಅವರು ಆರ್‌ಸಿಬಿ ಪರ 263 ಸಿಕ್ಸರ್‌ ಬಾರಿಸಿದ್ದಾರೆ. ರೋಹಿತ್‌ ಶರ್ಮಾ ಮುಂಬೈ ಪರ 262, ಕೀರನ್‌ ಪೊಲ್ಲಾರ್ಡ್ ಮುಂಬೈ ಪರ 258, ಎಂ.ಎಸ್‌.ಧೋನಿ ಸಿಎಸ್‌ಕೆ ಪರ 257 ಸಿಕ್ಸರ್‌ ಬಾರಿಸಿದ್ದಾರೆ.
ಚೆನ್ನೈ ವಿರುದ್ಧ ಗರಿಷ್ಠ

50+, ಕೊಹ್ಲಿ ನಂ.1
ಐಪಿಎಲ್‌ನಲ್ಲಿ ಚೆನ್ನೈ ಸೂಪರ್‌ ಕಿಂಗ್ಸ್‌ ವಿರುದ್ಧ ಅತಿ ಹೆಚ್ಚು ಬಾರಿ 50ಕ್ಕೂ ಹೆಚ್ಚು ರನ್‌ ಕಲೆಹಾಕಿದ ಆಟಗಾರರ ಪಟ್ಟಿಯಲ್ಲಿ ವಿರಾಟ್‌ ಕೊಹ್ಲಿ ಮೊದಲ ಸ್ಥಾನಕ್ಕೇರಿದ್ದಾರೆ. ಅವರು ಚೆನ್ನೈ ವಿರುದ್ಧ 10 ಬಾರಿ ಈ ಸಾಧನೆ ಮಾಡಿದ್ದಾರೆ. ಈ ಮೂಲಕ ಶಿಖರ್‌ ಧವನ್‌, ರೋಹಿತ್‌ ಶರ್ಮಾ ಹಾಗೂ ಡೇವಿಡ್‌ ವಾರ್ನರ್‌ರನ್ನು ಹಿಂದಿಕ್ಕಿದರು. ಈ ಮೂವರೂ ತಲಾ 9 ಬಾರಿ 50+ ರನ್‌ ಗಳಿಸಿದ್ದಾರೆ.
ತಂಡವೊಂದರ ವಿರುದ್ಧ

ಗರಿಷ್ಠ ರನ್‌ ದಾಖಲೆ
ಐಪಿಎಲ್‌ನಲ್ಲಿ ತಂಡವೊಂದರ ವಿರುದ್ಧ ಗರಿಷ್ಠ ರನ್‌ ಕಲೆಹಾಕಿದ ಆಟಗಾರ ಎಂಬ ಖ್ಯಾತಿಗೆ ಕೊಹ್ಲಿ ಪಾತ್ರರಾಗಿದ್ದಾರೆ. ಅವರು ಚೆನ್ನೈ ವಿರುದ್ಧ 1146 ರನ್‌ ಗಳಿಸಿದ್ದಾರೆ. ಪಂಜಾಬ್‌ ವಿರುದ್ಧ ಡೇವಿಡ್‌ ವಾರ್ನರ್‌ 1134 ರನ್‌ ಬಾರಿಸಿದ್ದು, ಅವರನ್ನು ಕೊಹ್ಲಿ ಹಿಂದಿಕ್ಕಿದರು. ಇನ್ನು, ಡೆಲ್ಲಿ ವಿರುದ್ಧ ವಿರಾಟ್‌ ಕೊಹ್ಲಿ 1130, ಪಂಜಾಬ್‌ ವಿರುದ್ಧ ಕೊಹ್ಲಿ 1104, ಕೋಲ್ಕತಾ ವಿರುದ್ಧ ವಾರ್ನರ್‌ 1093, ಕೋಲ್ಕತಾ ವಿರುದ್ಧ ರೋಹಿತ್‌ 1083 ರನ್‌ ಗಳಿಸಿದ್ದಾರೆ.
 

8 ಆವೃತ್ತಿಗಳಲ್ಲಿ ತಲಾ 500 ರನ್‌:
ವಾರ್ನರ್‌ ದಾಖಲೆ ಮುರಿದ ಕೊಹ್ಲಿ ವಿರಾಟ್‌ ಕೊಹ್ಲಿ 18 ಐಪಿಎಲ್‌ ಆವೃತ್ತಿಗಳ ಪೈಕಿ 8ರಲ್ಲಿ ತಲಾ 500+ ರನ್‌ ಕಲೆಹಾಕಿದ್ದು, ಈ ಸಾಧನೆ ಮಾಡಿದ ಮೊದಲ ಆಟಗಾರ ಎನಿಸಿಕೊಂಡಿದ್ದಾರೆ. ಅವರು 2011, 2013, 2015, 2016, 2018, 2023, 2024 ಹಾಗೂ 2025ರಲ್ಲಿ ಈ ಸಾಧನೆ ಮಾಡಿದ್ದಾರೆ. ಡೇವಿಡ್‌ ವಾರ್ನರ್‌ 7, ಕೆ.ಎಲ್‌.ರಾಹುಲ್‌ 6 ಆವೃತ್ತಿಗಳಲ್ಲಿ ತಲಾ 500+ ರನ್‌ ಗಳಿಸಿದ್ದಾರೆ.

04ನೇ ಬಾರಿ:
ಕೊಹ್ಲಿ ಸತತ 4 ಅರ್ಧಶತಕ ಬಾರಿಸಿದರು. ಆರ್‌ಸಿಬಿ ಪರ ಅವರು 2ನೇ ಬಾರಿ ಈ ಸಾಧನೆ ಮಾಡಿದ್ದಾರೆ. 2016ರಲ್ಲೂ ತಲಾ 4 ಫಿಫ್ಟಿ ಸಿಡಿಸಿದ್ದರು.