ಮೇ.17ರಿಂದ ಮೇ.21ರವರೆಗೆ ಹೆಬ್ಬಾಳ ಮೇಲ್ಸೇತುವೆ ಭಾಗಶಃ ಬಂದ್; ಪರ್ಯಾಯ ಮಾರ್ಗ ಇಲ್ಲಿದೆ ನೋಡಿ!

ಬೆಂಗಳೂರು (ಮೇ 17): ಹೆಬ್ಬಾಳ ಮೇಲ್ಸೇತುವೆಯಲ್ಲಿ ಹೆಚ್ಚುವರಿ ರಾಂಪ್ ಅಳವಡಿಸುವ ಕಾಮಗಾರಿಯ ಹಿನ್ನೆಲೆಯಲ್ಲಿ, ಮೇ 17 ರಿಂದ ಮೇ 21ರ ತನಕ 5 ದಿನಗಳ ಕಾಲ ಮೆಲ್ಸೇತುವೆಯ ಒಂದು ಭಾಗವನ್ನು ಬಂದ್ ಮಾಡುವ ನಿರ್ಧಾರ ಕೈಗೊಳ್ಳಲಾಗಿದೆ. ಪ್ರತಿದಿನ ರಾತ್ರಿ 12 ಗಂಟೆಯಿಂದ ಬೆಳಗಿನ ಜಾವ 3 ಗಂಟೆಯವರೆಗೆ ಈ ಕಾಮಗಾರಿ ನಡೆಯಲಿದ್ದು, ಈ ಅವಧಿಯಲ್ಲಿ ಕೆಲವು ಮಾರ್ಗಗಳಲ್ಲಿ ವಾಹನ ಸಂಚಾರ ನಿರ್ಬಂಧಿತವಾಗಲಿದೆ.

ಕಾಮಗಾರಿಯ ವಿವರ: ಕೆ.ಆರ್. ಪುರ ಕಡೆಯಿಂದ ಮೇಖ್ರಿ ವೃತ್ತದ ಕಡೆಗೆ ಸಾಗುವ ಹೆಬ್ಬಾಳ ಮೇಲ್ಸೇತುವೆಗೆ ಹೆಚ್ಚುವರಿ ರಾಂಪ್ ಅಳವಡಿಸುವ ಕಾಮಗಾರಿ ನಡೆಯುತ್ತಿದೆ. ಇದರ ಭಾಗವಾಗಿ, ರೈಲ್ವೆ ಹಳಿಗಳ ಮೇಲೆ 33.5 ಮೀ ಉದ್ದದ ಏಳು ಉಕ್ಕಿನ ಗರ್ಡರ್‌ಗಳನ್ನು ಅಳವಡಿಸಲಾಗುತ್ತಿದೆ. ಸುರಕ್ಷತಾ ಕ್ರಮವಾಗಿ, ಈ ಕಾಮಗಾರಿ ನಡೆಯುವ ವೇಳೆ ಸಂಚಾರವನ್ನು ತಾತ್ಕಾಲಿಕವಾಗಿ ನಿಲ್ಲಿಸಲು ನಿರ್ಧರಿಸಲಾಗಿದೆ.

ಸಂಚಾರ ಬಂದ್ ವಿವರ:
ದಿನಾಂಕ: ಮೇ 17 ರಿಂದ ಮೇ 21ರವರೆಗೆ
ಸಮಯ: ಪ್ರತಿದಿನ ರಾತ್ರಿ 12 ರಿಂದ ಬೆಳಗಿನ ಜಾವ 3 ಗಂಟೆ ತನಕ
ಪ್ರಭಾವಿತ ಮಾರ್ಗ: ಎಸ್ಟೀಮ್ ಮಾಲ್‌ನಿಂದ ಮೇಖ್ರಿ ವೃತ್ತದ ಕಡೆಗೆ ಸಾಗುವ ಹೆಬ್ಬಾಳ ಮೇಲ್ಸೇತು
ಯಾವ ವಾಹನಗಳಿದೆ ನಿಷೇಧ: ಎಲ್ಲಾ ರೀತಿಯ ವಾಹನಗಳಿಗೆ ನಿಷೇಧ

ಪರ್ಯಾಯ ಮಾರ್ಗದ ಸೂಚನೆ:
ಈ ಅವಧಿಯಲ್ಲಿ ಏರ್ಪೋರ್ಟ್ ಅಥವಾ ಎಸ್ಟೀಮ್ ಮಾಲ್‌ನಿಂದ ಮೇಖ್ರಿ ವೃತ್ತದ ಕಡೆಗೆ ತೆರಳುವ ವಾಹನಚಾಲಕರು ಈ ಕೆಳಗಿನ ಪರ್ಯಾಯ ಮಾರ್ಗವನ್ನು ಅನುಸರಿಸಬಹುದು:
ಎಸ್ಟೀಮ್ ಮಾಲ್ ಬಳಿಯ ಸರ್ವೀಸ್ ರಸ್ತೆಯಲ್ಲಿ ಪ್ರವೇಶ ಪಡೆಯಬೇಕು
ಹೆಬ್ಬಾಳ ವೃತ್ತದಲ್ಲಿ ಹೊರವರ್ತುಲಕ್ಕೆ ಬಲ ತಿರುಗಬೇಕು
ತುಮಕೂರು ರಸ್ತೆಯ ಮೂಲಕ ಚಲಿಸಬೇಕು
ನಂತರ, ಕುವೆಂಪು ವೃತ್ತದಲ್ಲಿ ಎಡ ತಿರುಗಿ
ನ್ಯೂ ಬಿಇಎಲ್ ರಸ್ತೆಯ ಮೂಲಕ ಮೇಖ್ರಿ ವೃತ್ತವನ್ನು ತಲುಪಬಹುದು

ನಗರದ ಬಹುಮುಖ್ಯ ಸಂಚಾರದ ಕೇಂದ್ರವಾಗಿರುವ ಹೆಬ್ಬಾಳ ಮೇಲ್ಸೇತುವೆಯಲ್ಲಿ ನಡೆಯುತ್ತಿರುವ ಇಂಜಿನಿಯರಿಂಗ್ ಕಾಮಗಾರಿ ಕಾರಣದಿಂದಾಗಿ ಕೆಲ ಸಮಯದ ತಾತ್ಕಾಲಿಕ ಅಡಚಣೆಗೊಳಗಾಗುವ ಸಾಧ್ಯತೆಯಿದೆ. ಸಾರ್ವಜನಿಕರು ಈ ಸಮಯದಲ್ಲಿ ಪರ್ಯಾಯ ಮಾರ್ಗಗಳನ್ನು ಉಪಯೋಗಿಸಿ, ಸಹಕಾರ ನೀಡಬೇಕಾಗಿ ನಗರ ಪೊಲೀಸ್ ಇಲಾಖೆ ವಿನಂತಿಸಿದೆ.