KD Movie ಸೆರಗ ಸರಿಸೋ ಬಗ್ಗೆ ಮೊದಲ ಬಾರಿ ರಿಯಾಕ್ಷನ್​ ಕೊಟ್ಟ ಸುದೀಪ್​: ಕಿಚ್ಚ ಹೇಳಿದ್ದೇನು

ಜೋಗಿ ಪ್ರೇಮ್ ನಿರ್ದೇಶನದ ಧ್ರುವ ಸರ್ಜಾ ಅಭಿನಯಿಸಿರುವಂತಹ ಕೆಡಿ ಸಿನಿಮಾದ ಸೆರಗ ಸರ್ಸೆ ಹಾಡು ಯಾವ ಪರಿಯಲ್ಲಿ ಸದ್ದು ಮಾಡಿತ್ತು ಎನ್ನುವುದು ಎಲ್ಲರಿಗೂ ತಿಳಿದದ್ದೇ. ಇದರಲ್ಲಿನ ಅಶ್ಲೀಲ ಸಾಹಿತ್ಯದ ವಿರುದ್ಧ ಸಿಕ್ಕಾಪಟ್ಟೆ ಸೋಷಿಯಲ್‌ ಮೀಡಿಯಾದಲ್ಲಿ ಗದ್ದಲವಾಗುತ್ತಲೇ, ಇದರ ಬಗ್ಗೆ ದೂರು ಕೂಡ ದಾಖಲಾಗಿತ್ತು. ಆ ಹಾಡನ್ನು ತೆಗೆದು ಈಗ ಸಿನಿಮಾ ರಿಲೀಸ್‌ ಮಾಡಲಾಗಿದೆ.

ಸಿನಿಮಾ ಬಿಡುಗಡೆ ಹಿನ್ನೆಲೆಯಲ್ಲಿ ಇಂದು ಮಾಧ್ಯಮಗೋಷ್ಠಿ ನಡೆಸಲಾಗಿತ್ತು. ಅದರಲ್ಲಿ ಸುದೀಪ್‌ ಕೂಡ ಹಾಜರಿದ್ದರು. ಈ ಸಂದರ್ಭದಲ್ಲಿ ಅವರು ಸೆರಗ ಸರ್ಸೆ ಕುರಿತು ಕೇಳಿದ ‌ಪ್ರಶ್ನೆಯೊಂದಕ್ಕೆ ತಮ್ಮದೇ ಆದ ಶೈಲಿಯಲ್ಲಿ ಉತ್ತರಿಸಿದರು,

ಈ ಹಾಡಿನಲ್ಲಿ ತಪ್ಪಿದೆ ಎಂದು ನಾನು ಹೇಳುವುದಿಲ್ಲ. ಕೆಲವು ಟೈಂ ಕೆಲವು ವರ್ಕ್ ಆಗಲ್ವಲ್ಲಾ, ಈಗಲೂ ಹಾಗೆಯೇ ಆಗಿದೆ ಅಷ್ಟೇ. ಗಲ್ಲ, ಒಪಿನಿಯನ್ಸ್ ಬೇಗ ಎಲ್ಲಾ ಕಡೆ ರೀಚ್ ಆಗುತ್ತೆ. ಏನೋ ಆಗಿರುತ್ತೆ, ಅದಕ್ಕಾಗಿ ಹೀಗಾಗಿದೆ ಎಂದಿದ್ದಾರೆ, ಈ ಮೂಲಕ ಈ ಹಿಂದೆಯೂ ಅಶ್ಲೀಲ ಎನ್ನುವಂಥ ಸಾಹಿತ್ಯದ ಹಲವು ಹಾಡುಗಳು ಬಂದಿರುವ ಬಗ್ಗೆ ಪರೋಕ್ಷವಾಗಿ ನಟ ನುಡಿದಿದ್ದಾರೆ.

ಆದರೆ, ಸೆರಗ ಸರ್ಸೆ ವಿವಾದ ಆಗಿರುವ ಬಗ್ಗೆ ಬೇಸರ ವ್ಯಕ್ತಪಡಿಸಿದ ಸುದೀಪ್‌, ಇದರಿಂದ ಬೇಸರವಾಯ್ತು. ಏಕೆಂದರೆ, ಪ್ರೇಮ್‌ ಅವರು, ತಾಯಿ ಬಗ್ಗೆ, ಎಮೋಷನ್ ಬಗ್ಗೆ ಎಷ್ಟೊಂದು ಸಾಂಗ್‌ ಬರೆದಿದ್ದಾರೆ. ಎಷ್ಟೋ ಮಂದಿ ಈ ಹಾಡುಗಳನ್ನು ಹಾಕ್ಕೊಂಡು ಹಾಕ್ಕೊಂಡು ಕೇಳಿ ಕೇಳಿ, ಮನೆಗಳಲ್ಲಿ ನಮ್ಮ ತಂದೆ ತಾಯಂದಿರಿಂದ ದೂರ ಆದವರು ಎಲ್ಲರೂ ಹೋಗಿ ಹತ್ತಿರ ಆಗಿದ್ದಾರೆ ಎಂದಿದ್ದಾರೆ.

ಆದರೆ ಈಗ ಈ ಒಂದು ಹಾಡಿನಿಂದ ಈ ರೀತಿ ಮಾತನಾಡುವುದು ಸರಿಯಲ್ಲ. ಒಬ್ಬರನ್ನು ತುಂಬಾ ಸಣ್ಣ ಎನ್ನುವಂತೆ ಫೀಲ್ ಮಾಡಿಸೋದು, ಏನೋ ಒಂದು ದೊಡ್ಡ ತಪ್ಪು ಮಾಡಿಬಿಟ್ರು ಅನ್ನೋದು ಸರಿಯಲ್ಲ ಎಂದಿದ್ದಾರೆ ಸುದೀಪ್‌.

ನಾವು ನಮ್ಮ ಜನರ ಬಗ್ಗೆಯೇ ಇಷ್ಟು ಹಾರ್ಶ್ ಆಗೋದು ಯಾಕೆ? ಕನ್ನಡದ ಒಬ್ಬ ನಿರ್ದೇಶಕರು, ಕನ್ನಡದ ಒಬ್ಬ ಸಾಹಿತಿ, ನಾವು ನಮ್ಮ ಜನರ ಬಗ್ಗೆಯೇ ಇಷ್ಟು ಹಾರ್ಶ್ ಆಗಬೇಕಾ ಎಂದು ಸುದೀಪ್‌ ಪ್ರಶ್ನಿಸಿದ್ದಾರೆ.