ಏರ್ ಇಂಡಿಯಾ ವಿಮಾನ ದುರಂತದ ಬಳಿಕ ಡಿಜಿಸಿಎ ಬೋಯಿಂಗ್ ವಿಮಾನಗಳ ಇಂಧನ ನಿಯಂತ್ರಣ ಸ್ವಿಚ್ಗಳ ತಪಾಸಣೆಗೆ ಆದೇಶಿಸಿದೆ. ಏರ್ ಇಂಡಿಯಾ ತನ್ನ ಬೋಯಿಂಗ್ 787 ಮತ್ತು 737 ಮ್ಯಾಕ್ಸ್ ವಿಮಾನಗಳಲ್ಲಿ ತಪಾಸಣೆ ನಡೆಸಿದ್ದು, ಯಾವುದೇ ತೊಂದರೆಗಳು ಪತ್ತೆಯಾಗಿಲ್ಲ.
ದೆಹಲಿ: ಅಹಮದಾಬಾದ್ನಲ್ಲಿ ನಡೆದ ಏರ್ ಇಂಡಿಯಾ ವಿಮಾನ ಅಪಘಾತದ ಬಳಿಕ, ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ (DGCA) ಬೋಯಿಂಗ್ ವಿಮಾನಗಳ ಇಂಧನ ನಿಯಂತ್ರಣ ಸ್ವಿಚ್ಗಳ (FCS) ತಪಾಸಣೆ ನಡೆಸಲು ಕಟ್ಟುನಿಟ್ಟಿನ ನಿರ್ದೇಶನ ನೀಡಿದೆ. ಈ ಹಿನ್ನೆಲೆಯಲ್ಲಿ, ಏರ್ ಇಂಡಿಯಾ ತನ್ನ ಎಂಜಿನಿಯರಿಂಗ್ ತಂಡದ ಮೂಲಕ ಎಲ್ಲಾ ಬೋಯಿಂಗ್ 787 ವಿಮಾನಗಳಲ್ಲಿನ FCS ಲಾಕ್ ಕಾರ್ಯವಿಧಾನಗಳ ಮುನ್ನೆಚ್ಚರಿಕಾ ತಪಾಸಣೆಯನ್ನು ಪ್ರಾರಂಭಿಸಿದೆ ಎಂದು NDTV ವರದಿ ಮಾಡಿದೆ.
ವಿಮಾನಯಾನ ಸಂಸ್ಥೆಯ ಅಧಿಕಾರಿಯೊಬ್ಬರ ಪ್ರಕಾರ, ತಪಾಸಣೆಗಳು ಪೂರ್ಣಗೊಂಡಿವೆ ಮತ್ತು ಯಾವುದೇ ತೊಂದರೆ ಪತ್ತೆಯಾಗಿಲ್ಲ. ಬೋಯಿಂಗ್ ನಿರ್ಧರಿಸಿರುವ ನಿರ್ವಹಣಾ ವೇಳಾಪಟ್ಟಿಯಂತೆ, ಎಲ್ಲ 787-8 ಮಾದರಿಯ ವಿಮಾನಗಳಲ್ಲಿ ಥ್ರೊಟಲ್ ನಿಯಂತ್ರಣ ಮಾಡ್ಯೂಲ್ (TCM) ಅನ್ನು ಈಗಾಗಲೇ ಬದಲಾಯಿಸಲಾಗಿದೆ ಎಂದರು. ಈ ಮಾಡ್ಯೂಲ್ FCS ವ್ಯವಸ್ಥೆಯ ಪ್ರಮುಖ ಭಾಗವಾಗಿದೆ. ಇದಕ್ಕೂ ಮೊದಲು, ಏರ್ ಇಂಡಿಯಾ ಎಕ್ಸ್ಪ್ರೆಸ್ ಬಳಕೆದಲ್ಲಿದ್ದ ಸಂಪೂರ್ಣ ಬೋಯಿಂಗ್ 737 ಮ್ಯಾಕ್ಸ್ ವಿಮಾನಗಳಲ್ಲಿಯೂ FCS ಪರೀಕ್ಷೆ ನಡೆಯಿದ್ದು, ಅಲ್ಲಿ ಸಹ ಯಾವುದೇ ತೊಂದರೆ ಕಂಡುಬಂದಿಲ್ಲ. ಈ ಪರಿಶೀಲನೆಗಳು, ಡಿಜಿಸಿಎ ನೀಡಿದ ಜುಲೈ 21ರೊಳಗಿನ ನಿರ್ದೇಶನೆಯ ಹಿನ್ನೆಲೆಯಲ್ಲಿ ಕೈಗೊಂಡ ಕ್ರಮವಾಗಿದೆ.
ಅಪಘಾತದ ಪ್ರಾಥಮಿಕ ತನಿಖಾ ವರದಿ:
ವಿಮಾನ ಅಪಘಾತ ತನಿಖಾ ಬ್ಯೂರೋ (AAIB) ಬಿಡುಗಡೆ ಮಾಡಿದ ಪ್ರಾಥಮಿಕ ವರದಿಯ ಪ್ರಕಾರ, ಏರ್ ಇಂಡಿಯಾ ಫ್ಲೈಟ್ AI-171 ನ ಎರಡೂ ಎಂಜಿನ್ಗಳು ಟೇಕ್ಆಫ್ ಆದ ಕೆಲವೇ ಕ್ಷಣಗಳಲ್ಲಿ ವಿದ್ಯುತ್ ಕಳೆದುಕೊಂಡಿದ್ದವು. ಪೈಲಟ್ಗಳು ನಿಯಂತ್ರಣ ಮರಳಿ ಪಡೆಯಲು ಪ್ರಯತ್ನಿಸಿದರೂ ವಿಫಲರಾಗಿದ್ದರು. ಈ ದುರಂತದಲ್ಲಿ ವಿಮಾನದಲ್ಲಿದ್ದ 241 ಪ್ರಯಾಣಿಕರು ಮತ್ತು ನೆಲದ ಮೇಲೆ ಇದ್ದ ಹಲವರು ಮೃತರಾದರು.
Related Articles
ಇಂಧನ ಕಟ್ಆಫ್ ಸ್ವಿಚ್ಗಳು "ರನ್"ನಿಂದ "ಕಟ್ಆಫ್" ಗೆ ಹೇಗೆ ಬದಲಾದವು? ಈ ಬದಲಾವಣೆ ಕೆಲ ಸೆಕೆಂಡುಗಳ ಅಂತರದಲ್ಲೇ ಸಂಭವಿಸಿದ್ದು, ತಾಂತ್ರಿಕ ದೋಷವೋ ಅಥವಾ ಮಾನವ ತಪ್ಪೋ ಎಂಬುದು ಇಂದಿಗೂ ಸ್ಪಷ್ಟವಾಗಿಲ್ಲ. ಕಾಕ್ಪಿಟ್ ಧ್ವನಿ ದಾಖಲೆಗಳಲ್ಲಿ ಒಬ್ಬ ಪೈಲಟ್ “ನೀನು ಯಾಕೆ ಇಂಧನ ಕಡಿತ ಮಾಡಿದ್ದೀ?” ಎಂದು ಕೇಳಿದಾಗ, ಇನ್ನೊಬ್ಬರು “ನಾನು ಮಾಡ್ಲಿಲ್ಲ” ಎಂದು ಉತ್ತರಿಸುವುದು ದಾಖಲಾಗಿದೆ.
AAIB ವಿವರಿಸಿದಂತೆ, ಹಾರಾಟದ ವೇಳೆ ಇಂಧನ ನಿಯಂತ್ರಣ ಸ್ವಿಚ್ಗಳನ್ನು "ಕಟ್ಆಫ್" ನಿಂದ "ರನ್" ಗೆ ಮರುಸ್ಥಾಪಿಸಿದಾಗ, FADEC (Full Authority Dual Engine Control) ವ್ಯವಸ್ಥೆ ಎಂಜಿನ್ ಮರುಚಾಲನೆ ಮತ್ತು ಥ್ರಸ್ಟ್ ಚೇತರಿಕೆಯನ್ನು ನಿರ್ವಹಿಸುತ್ತದೆ. ಈ ಸಂದರ್ಭದಲ್ಲಿ ಎಂಜಿನ್ 1 ಸ್ಥಿರಗೊಳ್ಳಲು ಆರಂಭಿಸಿದರೂ, ಎಂಜಿನ್ 2 ಸರಿಯಾಗಿ ಕೆಲಸ ಮಾಡಲು ವಿಫಲವಾಯಿತು. ಎಂಜಿನ್ ಪುನಃ ಉರಿಯುತ್ತಿದ್ದರೂ, ಅದು ಥ್ರಸ್ಟ್ ಚೇತರಿಸಿಕೊಳ್ಳಲಾಗದೆ, ಇಂಧನ ಪೂರೈಕೆಯಲ್ಲಿ ಅಡಚಣೆ ಕಂಡುಬಂತು.
ಬೋಯಿಂಗ್ 787 ಮತ್ತು 737 ಮಾದರಿಗಳಲ್ಲಿ ತಾಂತ್ರಿಕ ವೈಫಲ್ಯಗಳ ಅಪಾಯವನ್ನು ಗಮನದಲ್ಲಿಟ್ಟುಕೊಂಡು, ಡಿಜಿಸಿಎ ನೀಡಿದ ತಾತ್ಕಾಲಿಕ ನಿರ್ದೇಶನದಡಿ ವಿಮಾನಯಾನ ಸಂಸ್ಥೆಗಳು ತ್ವರಿತ ಕ್ರಮ ಕೈಗೊಂಡಿವೆ. ಮುನ್ನೆಚ್ಚರಿಕೆಯಾಗಿ ಪರಿಷ್ಕೃತ ತಪಾಸಣೆ ಮತ್ತು ತಾಂತ್ರಿಕ ನವೀಕರಣಗಳ ಮೂಲಕ ಭವಿಷ್ಯದ ವಿಮಾನ ದುರಂತಗಳನ್ನು ತಡೆಯುವಲ್ಲಿ ಇದು ಮಹತ್ವದ ಹೆಜ್ಜೆಯಾಗಲಿದೆ.
