₹1 ಲಕ್ಷ ಆಗಿರೋದು ಟ್ರೈಲರ್ ಅಷ್ಟೇ; ಇನ್ನೂ ಎಷ್ಟು ಹೆಚ್ಚಾಗುತ್ತೆ ಚಿನ್ನ? ತಜ್ಞರ ವಿಶ್ಲೇಷಣೆ

ಈ ಏರಿಕೆಗೆ ಹಲವು ಪ್ರಮುಖ ಕಾರಣಗಳಿವೆ. ಇಸ್ರೇಲ್‌ನಿಂದ ಇರಾನ್‌ ಮೇಲೆ ನಡೆದ ದಾಳಿ ಪ್ರಮುಖ ಕಾರಣ. ವರದಿಗಳ ಪ್ರಕಾರ, ಇಸ್ರೇಲಿ ಡ್ರೋನ್ ಇರಾನ್‌ನ ಪರಮಾಣು ಸ್ಥಾವರವನ್ನು ಗುರಿಯಾಗಿಸಿಕೊಂಡಿದೆ. ಇದರ ಪರಿಣಾಮ ಜಾಗತಿಕ ಷೇರುಪೇಟೆಯ ಮೇಲೆ ಬಿದ್ದಿದ್ದು, ಹೂಡಿಕೆದಾರರು ಸುರಕ್ಷಿತ ಆಯ್ಕೆಯಾದ ಚಿನ್ನದತ್ತ ಮುಖ ಮಾಡಿದ್ದಾರೆ. 

ಎರಡನೇ ಕಾರಣವೆಂದರೆ ಅಮೆರಿಕದ ಹಣದುಬ್ಬರ ದತ್ತಾಂಶ ನಿರೀಕ್ಷೆಗಿಂತ ಕಡಿಮೆ ಇರುವುದು. ಇದರರ್ಥ ಅಮೆರಿಕ ಈಗ ಬಡ್ಡಿ ದರಗಳನ್ನು ಕಡಿತಗೊಳಿಸಬಹುದು ಮತ್ತು ಬಡ್ಡಿ ದರಗಳು ಕುಸಿದಾಗ ಚಿನ್ನದ ಬೆಲೆ ಏರುತ್ತದೆ.

ಜೂನ್ 13 ರಂದು MCX ನಲ್ಲಿ ಚಿನ್ನ 99,500 ರೂ.ಗೆ ತೆರೆದಿದ್ದು, ಹಿಂದಿನ ದಿನ 98,392 ರೂ.ಗೆ ಮುಚ್ಚಿತ್ತು. ಹೀಗಾಗಿ 1,108 ರೂ. ಅಂದರೆ 1.12% ಏರಿಕೆಯಾಗಿದೆ. ದಿನವಿಡೀ ಈ ಏರಿಕೆ ಮುಂದುವರಿದು ಚಿನ್ನ 1,00,403 ರೂ. ತಲುಪಿದೆ. ಜೂನ್ 14 ರಂದು ದೆಹಲಿಯಲ್ಲಿ ಚಿನ್ನದ ಬೆಲೆ 10 ಗ್ರಾಂಗೆ 1,01,560 ರೂ. ಇದೆ.

ಬ್ಯಾಂಕ್ ಆಫ್ ಅಮೇರಿಕಾ (BofA) ಮುಂದಿನ 12 ತಿಂಗಳಲ್ಲಿ ಚಿನ್ನ $4,000/ಔನ್ಸ್ (3,43,598.80 ರೂ.) ತಲುಪಬಹುದು ಎಂದು ಹೇಳಿದೆ. ಅಂದರೆ ಭಾರತದಲ್ಲಿ ಈ ದರ ಇನ್ನೂ ಏರುತ್ತದೆ. ಗೋಲ್ಡ್‌ಮನ್ ಸ್ಯಾಚ್ಸ್ ಕೂಡ 2025 ರ ಅಂತ್ಯದ ವೇಳೆಗೆ ಚಿನ್ನದ ಬೆಲೆ $3,700/ಔನ್ಸ್ ಮತ್ತು 2026 ರ ವೇಳೆಗೆ $4,000 ತಲುಪಬಹುದು ಎಂದು ಹೇಳುತ್ತದೆ. 

ಕೇಂದ್ರ ಬ್ಯಾಂಕ್‌ಗಳ ಖರೀದಿ ಮತ್ತು ಭಯದ ವಾತಾವರಣ ಚಿನ್ನವನ್ನು ರಾಕೆಟ್ ವೇಗದಲ್ಲಿ ಮೇಲಕ್ಕೆ ಕೊಂಡೊಯ್ಯಬಹುದು ಎಂದು ಅವರು ನಂಬಿದ್ದಾರೆ.

ನೀವು ಈಗಾಗಲೇ ಚಿನ್ನದಲ್ಲಿ ಹೂಡಿಕೆ ಮಾಡಿದ್ದರೆ, ಈಗ ಮಾರಾಟ ಮಾಡುವ ಸಮಯವಲ್ಲ ಎಂದು ತಜ್ಞರು ಹೇಳುತ್ತಾರೆ. ಹೊಸ ಹೂಡಿಕೆದಾರರು ಸ್ವಲ್ಪ ಕಾಯ್ದು ನೋಡುವ ತಂತ್ರ ಅನುಸರಿಸಬೇಕು. ಚಿನ್ನದ ಮಹತ್ವ ಈಗ ಮದುವೆ ಅಥವಾ ಹಬ್ಬಗಳಿಗೆ ಮಾತ್ರ ಸೀಮಿತವಾಗಿಲ್ಲ, ಇದು ಭೌಗೋಳಿಕ ರಾಜಕೀಯಕ್ಕೂ ಸಂಬಂಧಿಸಿದೆ.

ಇಸ್ರೇಲ್-ಇರಾನ್ ಯುದ್ಧದಿಂದಾಗಿ ಮಧ್ಯಪ್ರಾಚ್ಯದ ತೈಲ ಪೂರೈಕೆ ನಿಲ್ಲುವ ಯಾವುದೇ ಸೂಚನೆಗಳಿಲ್ಲ ಎಂದು ಗೋಲ್ಡ್‌ಮನ್ ಸ್ಯಾಚ್ಸ್ ಹೇಳಿದೆ. ತೈಲ ಪೂರೈಕೆಗೆ ಅಡ್ಡಿಯಾದರೆ, ಚಿನ್ನದ ಜೊತೆಗೆ ಜಾಗತಿಕ ಆರ್ಥಿಕತೆಯ ಮೇಲೆ ಭಾರಿ ಪರಿಣಾಮ ಬೀರುತ್ತದೆ.